| 早排 Candy 唔舒服，佢睇完醫生之後同我講：應該有左囉 ...預產期是2月22日 果一刻，並沒有像電視D主角般誇張，只是無乜表情，呆了一呆，的確有D錯愕 ... 數數下，我仲帶佢六四晚會坐足一晚添 ... 我雖然無乜特別興奮，或者特別緊張，反而Candy剛恰被認定為高齡產婦就好不安，印左張四版紙的禁忌，小小不適就好驚好緊張 ... 現在剛足三個月，做過兩三個檢查都算正常和穩定，開始慢慢向外界宣佈！我也有同朋友親戚講，盡量不要太興奮，以免讓Candy有太大壓力嘛... 上星期在浸會拍了第一張沙龍，4.5cm長的B，雖然睇唔到係仔定係女，但照超聲波都算乖，呢頭讚佢好定，就立即大大力彈一下out of screen ... 個醫生都笑話都係唔讚得 ... 第一胎是仔還是女好呢？對我來說，真的無所謂！係咪好興奮呢 ... 咦！我真係唔係好覺喎 ... 不過呢個B都算識得揀時候囉，正當Candy老闆想炒人之時，一張醫生紙就救番未來一年的收入！而且由而家開始陀，秋涼至入冬才見肚，媽咪都唔駛咁辛苦，到佢三歲時我就剛好還哂房協首置條數，果幾千蚊就自動過戶到佢既教育喇 ... 不過要煩也有不少，邊個幫手湊呢？我呢d番工時間真係好煩，總與candy的上班時間有一兩小時空隙 ... 真係好煩 ... 不過有D野其他人都可以幫手既，就係改名喇！條件是筆劃少，發聲響亮，咁我姓陳，大家幫下手諗諗喇！！ |
| |
| 參與政治有很多模式，留意新聞可以，評論時事可以，在個人網誌可以，再高些層次的，當然便是參選，直接由參與變成影響政治！ 自問已經過了直接參與政治的衝動，但心裡總有團火，我覺得我應該可以為社會做得更多 ... 聽鄺議員講，我地果輯政在攪Gag的窩心對話系列，講有關菜國村，有好多政策官員都聽過，更有人放上youtube ... 開始覺得，參政以外，自有影響政策的出路 ... Part 1：http://teenpower.rthk.org.hk/hosting_program/yp_gag/program_clip_asx/20090531/clip_1000.asx Part 2：http://teenpower.rthk.org.hk/hosting_program/yp_gag/program_clip_asx/20090607/clip_1003.asx 人總是如此，總無一刻可以定下來，終於完成普通話中級課程，講得好好就唔覺，總之唔會講些港式國語吧 ... 在不斷練習普通話的時候，就接到師傅來電（呢個係大學既導師師父，並非泰拳師父 ...），想我運用對醫療政策的知識，幫一幫天水圍的居民尋找更多理據，爭取當地興建醫院，因為當地居民只懂嚷好慘，好需要醫院外，就無第三句去支持點解政府要科水起醫院 ... 屯門博愛不斷擴建，天水圍還有興建醫院的迫切性嗎？如果以當年興建將軍澳醫院的成功例子比較，點解今年施政報告拍板後，預算案還沒有科第一筆錢予醫管局呢？又玩拖字訣？ 當然wondering things 和watching things happen 並不是我的性格，漸漸發覺自已好似變左加入左壓力團體一樣 ... 當然，參與後就好難會客觀觀察事物 ...點都好！我已經準備好一些材料，希望可以幫到當地居民吧！雖然只以顧問身份，但也覺得份量好重 ... |
| |
| 對於近日港大學生會會長陳一鍔，發表對六四的評論，實在令我非常沮喪！為什麼今天的香港大學生會變成這樣是非不分！
驅散人群有很多方法，為什麼中央在六月三日發出戰前動員令？指令士兵用實彈和坦克圍堵天安門廣場？
當年北京學生只是透過和平手法，以集會靜坐、示威甚至絕食等非暴力手段，悼念胡耀邦及希望透過人大常委的接見，對國家提出七點要求！事件中無論中央怎樣解說，當時有學生死在自已國家軍隊的槍和坦克之下，這是不容否認的事實！
陳同學指希望提出其他觀點，讓同學討論，講什麼類似學生領袖為什麼不見好就收？學生也應對事件負上一些責任等言論！
簡直一派胡言，學生用和平手段爭取，怎會料到國家會用實彈和坦克進行大規模屠殺等非理性手段！怎樣介定為之見好就收？難道發出聲明後散去？這就叫做爭取？這就是見好就收？這叫做戲並非爭取！
我希望大家明白一點
錯事用任何角度和觀點量度，都仍然係錯事！
社會科學訓練學生有批判性思考，並非訓練學生是非不分，癲倒黑白！更並非為做錯事的主謀尋求開脫！
我非常質疑陳同學本身的邏輯思維，由於學生因錯於組織力弱，所以中央下旨屠殺學生便有理！所以認為六四學運中，我們不應單單只針對中央，學生也要反省責任等等，為當時下令的中央政府降低罪孽！！我們反對日本篡改侵華史實，美化南京大屠殺！如果依陳同學的邏輯，那樣中國是否都應該為南京大屠殺負上些微責任？
唯恐現今的大學生唔明，我再用淺白一些的例子來說明吧！
一個小孩向父親扭計，爭取佢應得既權利，怎料父親勸極唔聽，便從懷中出手槍，一槍打死小孩 ... 現在就有大學生覺得，應該從不同角度思考事件，為什麼小孩沒有完善地訂下扭計的計劃？點解當初唔識見好就收？所以覺得一槍打死小孩的父親，不應負所有責任云云 ...
唉 ... 真係！這些就是我們納稅人培育的大學生！是非不分！
|
| |
| 今日竟然心血來潮，想試下搵番兒時美劇偶像 MacGyver（玉面飛龍） 記得當年細細個，見呢個外國特工，獨來獨往，絕不與敵硬碰硬，運用豐富的化學和物理知識，使用身邊毫不起眼的日用家居用品完成任務，廚房搵D用具，廁所搵D清潔劑，左溝右溝就攪掂，好鬼英 ... 當時睇完就會覺得，原來身邊既物品咁鬼危險，真係唔敢亂來，驚炸鬼左間屋，回想都好白痴 ... 不過，咁樣總比下下出槍出刀，來得真實 ... |
| |
| 月尾做身體檢查，畢竟副偈用左幾十年，隔兩年都應該去check下 ... 當然加上老爸上年發現有癌症，我今年差不多大check咁滯 ... 報告出左，好多野都正常，見我果個醫生都好後生，雖然已年屆三十有六，身體健康的指數比後生的更加正常，當然佢聽完我的飲食起居習慣，佢都話 ... 唔怪之得喇！！ 其實我都沒有好好整理 ... 應該係規限自已的起居習慣 ... 不過大致上都可以跟大家分享： 起床梳洗後習慣渴（灌）兩大杯暖開水 早餐無話特別挑健康食物，不過一定要有炒蛋和凍奶茶小甜 ... 操拳的日子會廷遲食午餐，食香蕉或者蘋果，待操練完才食午飯 每天喝不止八杯水，每天排便至少一次 一個月都會喝一兩罐啤酒，食一至兩包薯片左右 ...不過純粹貪口癮或者社交需要，但永不喝醉，我唔飲無人迫到我既 ...不吸煙 我隔日會食鈣片，每天一枝益力多，以前早晚有食冬蟲夏草丸的，不過食開果隻已經買唔到 ... 要去北京買架！！ 一星期最少跑步兩天，每次一小時，一次跑距離，一次跑速度 ... 唔駛操拳的日了，在家都會玩一兩組體能 ... 好鐘意食菜，飲湯 ... 我始終覺得，我地食不少垃圾食物，或者用不同程度的方式去折磨自已的身體，點解唔想下用小小錢，買好些食物，投資在自已身體呢？當然，我都有要改善的地方！唯一死穴：唔夠訓 ...無計喇，做得呢份工！但其實我有好多時都係 "自然醒"，比好多人被鬧鐘嘈醒的，幸褔得多！！ |
| |
